Найрамдал төвд өнгөрүүлсэн өдрүүд
Төслийн эко сургуулийн багш сурагчид Найрамдалд төвд болсон “Уур амьсгалын өөрчлөлтийн эсрэг ... Бид юу хийж чадах вэ?” олон улсын бага хуралд оролцоод ирлээ.

Сурагчид өртөө болон хуваагдаж, зусланг тойрон бяцхан аялал зохион байгуулж, ургамал, ан амьтаны талаархи өөрсдийн мэдлэгээ ярилцан  хуваалцаж, хувь хүн уур амьсгалын өөрчлөлтийн эсрэг юу хийвэл зохистой тухай мэдлэгийг багш нараасаа суралцсан. Тэд байгаль хамгааллын төрөл бүрийн тоглоом тоглож, экологийн ул мөр гэж юуг хэлдэг тухай мэдлэгтэй болсон. Аливаа асуудлыг тоглоомын аргаар ойлгуулах нь үр дүнтэй байдагаас гадна хүмүүсийн харилцааг сайжруулж, хүмүүжлийн ач холбогдолтой байдагаараа онцлогтой.

Анужин, Ховд аймгийн 6-р эко сургуулийн сурагч: Би огт танихгүй хүүхдүүд, багш нартай нэг баг болон тоглосон. Гэхэд энэ хүмүүсийг олон жил мэддэг, таньдаг юм шиг сэтгэгдэл надад төрж байсан. Их хөгжөөнтэй гоё байсан.

Эко сургуулийн багш нар сургуулийн гаднах болон доторхи орчны үнэлгээг хэрхэн хийх, байгаль хамгаалах үйл ажиллагаагаа хэрхэн зөв төлөвлөх, эргээд үнэлгээ хийх шинэ аргачилалыг танилцуулах дадлага хичээл нь бусад багш нарт сонирхолтой, шинэлэг, мөн санаа авахуйц байж чадсан.

Эко сургуулиуд ийм төрлийн арга хэмжэнд анх удаа оролцож байгаа тул сонирхотой байснаас гадна нэгэн хэлбэрийн сорилт байсан гэж хэлж болно.

Давааням, эко сургуулийн багш: Бүх сайн сайхан, зөв үйл хүүхдээс эхлэлтэй гэдгийг энд ирээд улам бүр мэдэрлээ. Хүүхдүүдтэйгээ хамт хийж болох олон шинэлэг санаа, чин хүсэл эрмэлзэлийг агуулан буцаж байна.

Энэхүү бага хурал нь Монгол Улсын Ерөнхийлөгчийн ивээл дор Монголын хүүхдийн зуслангуудын холбооны санаачилгаар явагдаж өнгөрсөн ба дэлхийн уур амьсгалын өөрчлөлтийн эсрэг хөдөлгөөнд зуслангуудын оролцоог идэвхжүүлэх, зусланд энэ сэдвээр зохион явуулах хөтөлбөрийн арга, хэлбэрийн тухай мэдээлэл солилцох, харилцан туршлага судлах, суралцах зорилготой.